Construccion y renobacion di compleho J.F. Kennedy a alcansa su punto mas halto

ORANJESTAD – Recientemente a tuma luga e tradicional ceremonia di ‘spantenbier’ na e proyecto di ex John F. Kennedyschool cu, manera ta conocí, ta wordo restaura y amplia pa bay fungi como compleho di instancianan den enseñanza. Segun custumber, e ocasion ta marca e momento den cual e trabounan di construcción ta alcansa e punto di mas halto, caminda ta instala bandera di Aruba. AIB Bank N.V. (AIB), pa medio di AIB Vastgoed N.V. ta propietario di e edificio y ta encarga cu e proyecto. Pa comparti e momento significativo di spantenbier, AIB hunto cu Bohama Aruba a invita diferente persona na un encuentro caminda su director, Frendsel Giel a hiba palabra den presencia di Minister di Educacion, Armando Lampe ademas di Parlamentarionan y otro invitadonan.

Aki a relata con e edificio original di John F. Kennedyschool a keda cla na 1953; mientras cu na 1968 a añadi un seccion mas. Den decada 80 a stop di haci uso di e edificio y esaki a keda bandona te ora cu na aña 2016 AIB Bank N.V./AIB Vastgoed N.V. a cumpr’e for di Gobierno di Aruba.

E proyecto di restauracion y ampliacion di e facilidad ta carga cune un presupuesto di 26 miyon Florin y a inicia na mei 2018 bou encargo di Bohama Aruba N.V. E contract ta inclui restauracion di e edificio monumental, construccion di edificio nobo y transformacion di werkplaats den dos espacio multifuncional. Hunto, e tres structura ta suma un total di 6.335 meter cuadra di construcción riba 15.582 meter cuadra di tereno. Un total di 60 obrero ta participa den e trabounan cu, actualmente, ta 40% avanza y basa riba e trayectoria te cu awor, ta anticipa cu lo keda cla na tempo den luna di januari 2020, y segun presupuesto. Un bes finalisa, Directie Onderwijs, Inspectie Onderwijs, Bureau Leerplicht, Dienst Publieke Scholen y Bureau Traimerdia reuniendo aproximadamente 200 empleado, lo por muda y cuminsa opera den luna di februari 2020.

AIB Bank N.V./AIB Vastgoed N.V. ta satisfecho di wak con otro di nan proyectonan na Aruba ta hayando forma. Atrabes di e compleho nobo John F. Kennedy, un biaha mas e entidad financiero ta haci su parti den cumpli cu e necesidadnan di desaroyo di nos isla; tanto den sector publico, como priva. AIB Bank N.V./AIB Vastgoed N.V. ta gradici tur organisacion y individuo cu ta contribui na e desaroyo positivo di e proyecto aki, incluyendo e trahadornan di Bohama Aruba y Gobierno di Aruba pa e confiansa cu a duna AIB.